حلم حياتك

هايل موضوع فعلا ممتاز وانا فخورة بكوني اول حد يرد عليه ويحكي عن حلم حياته

من صغري وانا بحلم اعمل شئ مفيد ومميز .بحلم اني اعلي واكبر واوصل لاعلي درجات ومراتب العلم انا مش هقدر انكر ان كان ليه احلام كتير مش كلها قدرت احققها لكن اللي عايزة اقوله اني حدت لنفسي اهم هدف واتمسكت بيه وضحيت كتير اوي علشان اوصله

انا بحب العلم والدراسة والمعرفة حلم حياتي ان احصل علي درجة الدكتوراة في فلسفة المحاسبة . دخلت كلية التجارة وكنت بنجح بتقدير كويس جيد جدا وجيد احيانا لحد ما اتوفي والدي وكان صابح عليا امتحان البكالريوس وكانت نتيجة وفاته دي اني حصلت علي مقبول كتقدير عام حاولت ادخل الماجستير الجامعة منعتني وقاتلي لازم تكوني تقديرك العام جيد علي الاقل قولتلهم طيب ادخل دبلوم الدراسات العليا وبعدها اكمل قولولي لاء لازم تفوت سنة علي تخرجك وفعلا انتظرت سنة والحلم لسه عندي بنفس درجة الحماس وجيت علشان اقدم منعتني الظروف وكل الناس وقفوا ضدي علي اعتبار ان البنت مش لازم تضيع عمرها في التعليم البنت لازم تتجوز وفي بيت جوزها تعمل اللي هي تعوزة المهم كان نتيجة الظروف دي اني مقدرتش ادخل لان ضاع الوقت ومكنش معايا فلوس اقدم واللي المفروض يساعدوني مش موافقين وجت السنة اللي بعدها اصريت اني ادخل واتحديت كل الناس باني لازم ادخل واحقق حلم حياتي وبالفعل دخلت الدبلومة وحصلت في اول وتاني سنة علي تقدير جيد جدا عارف احلي حاجة في الدنيا بقي ايه اني دلوقتي وبعد كل المعاناه دي في الماجستير حلم حياتي الحمد لله قدرت اوصل واتغلب علي كل الصعاب وطبعا ده كله بتوفيق ربنا انا بسعي وبعمل اللي عليا وربنا ولي التوفيق . اللي عايزة اقوله ان اللي يحط ادامه هدف واللي عنده طموح انه يبقي شئ بيوصله وبيقدر يحققه طالما عنده عزيمة واصرار وايمان باالشئ اللي بيحبه .

هدفي من المنتدي وسبق ان ذكرته اننا كلنا نتجمع ايد واحدة نسمع بعض ونحفز بعض ونساعد بعضنا اننا نكون افضل عايزين نتمني الخير لبعض

عايزة اسمع قصص كفاحكم
عايزة اعرف كان نفسك في ايه ؟
وحققته ولا لاء ؟
ولو محققتوش ايه اللي منعك واحنا نساعدك ؟

ياريت ياجماعة نسمع بعض ونتعلم من بعض من اللي غلط ومن اللي مشي الطريق صح

ميرسي اوي علي الموضوع وااسف علي الاطاله